STQARRIJA MILL-MINISTERU GĦALL-AFFARIJIET EWROPEJ U L-UGWALJANZA
-
Il-Ministru
għall-Affarijiet Ewropej u l-Ugwaljanza Edward Zammit Lewis u ċ-Chairman
tal-Korporazzjoni għar-Riġenerazzjoni tal-Port il-Kbir Stefan Zrinzo Azzopardi
żaru x-xogħlijiet ta’ restawr li għaddejjin bħalissa fis-sotterran tal-Berġa
ta’ Aragona.
Waqt li kienu
għaddejjin xogħlijiet ta’ skavar, inkixef forn uniku ta’ żmien il-Kavallieri li
kien ilu mirdum għal mijiet ta’ snin taħt wieħed mill-uffiċini. Mir-riċerka
tal-Korporazzjoni tar-Riġenerazzjoni tal-Port il-Kbir u tas-Sovratendenza
tal-Wirt Kulturali, irriżulta li dan il-forn kien uniku għal pajjiżna u fost
l-uniċi fid-dinja li għadu prattikament intatt u preservat fl-istat oriġinali
tiegħu.
Hu maħsub li
ladarba jitlestew ix-xogħlijiet ta’ restawr dan il-wirt storiku jibqa’ mikxuf u
aċċessibbli bħala attrazzjoni rikka oħra tal-Belt Kapitali.
Lil hinn minn
dan kollu, permezz tax-xogħlijiet li għaddejjin bħalissa qed jitneħħew
strutturi relattivament moderni biex il-Berġa ta’ Aragona tingħata d-dehra
oriġinali tagħha kif mibnija mill-Kavallieri. B’hekk il-Berġa ta’ Aragona se
terġa’ tingħaqad mal-House of Catalunya permezz ta’ passaġġ li nkixef u
nfetaħ mill-ġdid.
Dan kollu
filwaqt li se tiżdied l-aċċessibbiltà permezz ta’ entratura fi Triq il-Punent,
flimkien mal-faċilitajiet kollha meħtieġa biex il-Berġa ta’ Aragona tkun
aċċessibbli għal kulħadd.
Il-Ministru
għall-Affarijiet Ewropej u l-Ugwaljanza Edward Zammit Lewis fisser kif il-Berġa
ta’ Aragona, li kienet l-Uffiċċju tal-eks prim ministri George Borg Olivier u
Dom Mintoff, tiġbor fiha wirt storiku u politiku uniku li għandu jiġi protett u
minsuġ fl-istorja ta’ pajjiżna. Huwa żied li b’dawn ix-xogħlijiet, mhux biss
qed nilħqu dan l-għan, iżda qed nassiguraw li l-Berġa ta’ Aragona, li llum
tospita l-Ministeru għall-Affarijiet Ewropej u l-Ugwaljanza, tkun verament sit
li jista’ jitgawda minn kulħadd u mingħajr ebda distinzjoni. Din ukoll hija
kwistjoni ta’ ugwaljanza, temm jgħid il-Ministru Zammit Lewis.
Min-naħa tiegħu,
iċ-Chairman tal-Korporazzjoni għar-Riġenerazzjoni tal-Port il-Kbir Stefan
Zrinzo Azzopardi spjega li dan il-proġett, li qed isir b’investiment ta’ madwar
€1m mill-fond tal-ministeru, isegwi r-restawr tal-faċċati tal-Berġa ta’
Aragona, tal-House of Catalunya u tal-Pilar, li kien parti mill-pjan
tar-riġenerazzjoni taż-żona ta’ Marsamxett – proġett kofinanzjat minn fondi
Ewropej b’total ta’ madwar €24m.
