Il-Gvern jinsab kommess li tissaħħaħ is-sigurtà u l-buon ordni f’Paceville. Dan il-proċess diġà beda u waħda mill-miżuri, fost oħrajn li ngħatat importanza kienet, li fi tmiem il-ġimgħa, żdiedet il-preżenza tal-Pulizija fit-toroq ta’ Paceville.
Għarafna li s-sitwazzjoni trid tiġi indirizzata permezz ta’ kollaborazzjoni minn oqsma differenti fis-soċjetà ċivili. B’hekk fl-aħħar xhur fi ħdan il-Ministeru għall-Intern u s-Sigurtà Nazzjonali waqqafna grupp ta’ ħidma magħmul minn rappreżentati ta’ stakeholders li jinkludu Sindki tal-Kunsilli Lokali taż-żona ta' Paceville, l-Awtorità Maltija tat-Turiżmu, il-GRTU, il-Pulizija u l-Fondazzjoni għall-iżvilupp ta’ żoni turistiċi bil-għan li jimplimenta miżuri proattivi u li huma neċessarji biex tissaħħaħ is-sigurtà f'Paceville u 'l madwar.
Wara snin twal minn mindu Paceville inbidel minn żona residenzjali għal dik ta’ divertiment, wasal iż-żmien li ssir bidla bis-serjetà. Sfortunatament il-fenomenu ta’ Paceville minn dejjem ġab miegħu sfidi, kemm ta’ natura soċjali kif ukoll minn aspetti ta’ saħħa u anke sigurtà, li huwa meħtieġ li jkunu ndirizzati b’aktar forza.
Nagħrfu li dan it-titjib meħtieġ hu possibli biss permezz ta’ sforz kollettiv. Għaldaqstant biex tkompli tissokta l-ħidma biex jitfassal pjan sħiħ u jittieħdu d-deċiżjonijiet meħtieġa, bħala Ministru nixtieq noffri lill-pubbliku l-opportunità li wkoll isemma’ leħnu. Hemm diversi aspetti li jridu jirreġistraw titjieb fosthom fil-kamp leġislattiv, fil-qasam tal-infurzar, taħriġ ipprovdut u anke f’dak li jirrigwardja s-saħħa u s-sigurtà. Dan huwa Gvern li jisma’ u għalhekk permezz ta’ din il-konsultazzjoni pubblika intom mħeġġin tgħaddu s-suġġerimenti u l-ideat tagħkom.
Il-proposti kollha sejrin ikunu evalwati u mogħtija l-attenzjoni li tixraq.
Dawn intlaqgħu sa nhar il-Ġimgħa, 4 ta’ Diċembru 2015.
Nemmen li l-pubbliku għandu x’jikkontribwixxi biex dawn l-isfidi jintgħelbu.
Min-naħa tiegħi, kemm bħala politiku u fuq kollox missier, se nibqa’ determinat biex b’kollaborazzjoni mal-awtoritajiet rispettivi, is-soċjetà ċivili u s-settur privat inkomplu nwettqu ħidma favur iż-żamma tal-ordni, ir-rispett lejn il-liġi u ambjent li joffri serħan tal-moħħ lil ħafna ġenituri bħali.
Carmelo Abela
Ministru