Sfond
Il-Gvern Malti wiegħed li se jiftaħ is-soċjetà, li jiċċelebra d-diversità, li jirrikonoxxi r-realtajiet soċjali ta’ madwarna, li jgħożż l-identità Maltija mingħajr diskriminazzjoni, li jiżgura l-ugwaljanza u r-rispett lejn gruppi minoritarji u, fuq kollox, li jħares id-drittijiet fundamentali tal-bniedem u l-libertajiet ta’ kulħadd.
Il-Gvern jemmen li r-realtajiet preżenti li qegħdin jiffaċċjaw l-immigranti li huma ċittadini ta’ pajjiżi terzi (jiġifieri dawk il-pajjiżi li mhumiex membri tal-Unjoni Ewropea), għandhom jingħataw attenzjoni immedjata.
Għal din ir-raġuni, il-Ministeru għad-Djalogu Soċjali, Affarijiet tal-Konsumatur u Libertajiet Ċivili (MSDC) nieda proġett taħt l-isem Mind D Gap: Together we can make the difference (IF 2013-17). L-għan tiegħu huwa li jappoġġja l-isforzi li jsiru sabiex ċittadini ta’ pajjiżi terzi li ġejjin minn sfondi nazzjonali, ekonomiċi, soċjali, kulturali, reliġjużi, lingwistiċi u etniċi differenti, sabiex jissodisfaw il-kundizzjonijiet ta’ residenza u sabiex jiffaċilitaw l-integrazzjoni tagħhom fis-soċjetà Maltija. Il-proġett huwa intenzjonat sabiex jigwida u jinforma l-Istrateġija Nazzjonali għall-Integrazzjoni tal-Immigranti 2015-2020, li mistennija tkun ippreżentata aktar tard matul l-2015.
Din l-Istrateġija se tkun żviluppata f’qafas li jippromwovi d-drittijiet tal-bniedem, opportunitajiet u obbligazzjonijiet indaqs għal kulħadd. Fost affarijiet oħra, se tippromwovi d-diversità bħala valur bażiku għall-kisba ta’ koeżjoni soċjali akbar.
L-għan tal-Istrateġija huwa li jinġiebu bidliet vera fis-soċjetà tagħna lill-immigranti li huma ċittadini ta’ pajjiżi terzi, u sabiex tinbena komunità fejn kulħadd, irrispettivament mir-razza, kulur, reliġjon jew opinjoni politika, età, sess, ġeneru, diżabbiltà, orjentazzjoni sesswali, identità tal-ġeneru jew kwalunkwe status ieħor, jista’ jgħix, jaħdem u jirnexxi f’kuntest ta’ ġustizzja, ugwaljanza, drittijiet, responsabbiltajiet u rispett.
Oqsma ta' Politika Ewlenin
L-oqsma li ġejjin ġew identifikati bħala rilevanti u importanti sabiex jintlaħaq l-għan tal-integrazzjoni ta’ ċittadini ta’ pajjiżi terzi, u b’hekk nippromwovu l-valur bażiku u komuni ta’ soċjetà karatterizzata mid-diversità. Dawn l-oqsma politiċi se jkunu qed jistabbilixxu direzzjoni u gwida lejn l-iżvilupp tal-Istrateġija.
Din l-Istrateġija timmira li tiżgura li l-miżuri li jirrigwardaw servizzi, inizjattivi u interventi jiġu żviluppati, implimentati u/jew imsaħħa, b’hekk tipprovdi għal proċessi effettivi ta’ integrazzjoni.
Dawn l-oqsma huma:
1. Niddefendu d-drittijiet u nissodisfaw id-dmirijiet: antidiskriminazzjoni u ugwaljanza
2. Nirrisolvu l-fruntieri soċjali u jkunu pprovduti l-opportunitajiet: edukazzjoni / suq tax-xogħol
3. Ikunu promossi relazzjonijiet interkulturali / Titqajjem kuxjenza pubblika dwar l-integrazzjoni: tingħata aktar setgħa lill-komunitajiet lokali
4. Parteċipazzjoni ċivili: Nilħqu ċ-ċittadini ta’ pajjiżi terzi
5. Djalogu istituzzjonali: Kunsill Konsultattiv ta’ ċittadini ta’ pajjiżi terzi / dawk li jfasslu l-politika u dawk li jieħdu d-deċiżjonijiet
Mistoqsijiet għall-konsultazzjoni
L-Istrateġija Nazzjonali għall-Integrazzjoni tal-Immigranti 2015-2020 se tistabbilixxi Għanijiet Strateġiċi taħt kull wieħed minn dawn l-oqsma ta’ politika ewlenin. Din l-Istrateġija se timmira li twaqqaf struttura fejn fiha jkun hemm riżorsi li jkunu jistgħu jitħaddmu b’mod effettiv u integrat biex jagħmlu użu strateġiku mill-finanzjament disponibbli, tkun evitata d-duplikazzjoni, tkun żgurata l-kumplamentarjetà, u jintleħaq l-għola impatt fis-soċjetà.
1. Taqbel mal-linja ġenerali tal-Oqsma ta’ Politika Ewlenin kif indikati hawn fuq?
o Hemm xi ħaġa li għandha tiżdied jew titħalla barra?
o Għandek xi proposti li tixtieq twassal f’dan il-kuntest?
2. Jekk jogħġbok daħħal xi kummenti jew proposti addizzjonali li tixtieq tagħmel fir-rigward tal-integrazzjoni ta’ ċittadini ta’ pajjiżi terzi.
3. Jekk jogħġbok ibgħatilna kwalunkwe dokumenti li jirreferu għall-integrazzjoni fir-rigward tal-kuntest nazzjonali li inti temmen li għandhom jiġu kkunsidrati fil-formulazzjoni tal-Istrateġija.
L-għan ta’ din il-konsultazzjoni huwa biex individwi u organizzazzjonijiet ikunu pprovduti b’opportunità li jikkummentaw dwar l-Istrateġija Nazzjonali għall-Integrazzjoni tal-Immigranti 2015-2020. Il-mistoqsijiet għandhom jinqraw flimkien mad-dokument tal-konsultazzjoni - 
Mind d Gap - dokument ta' konsultazzjoni- MT.pdf
Wara li r-risposti kollha jiġu kkunsidrati, se jkun ippubblikat rapport fuq is-sit tal-MSDC.